Mamulö'ö Wikipedia:Sanandrösa (section)

== Halöŵö lima fakhe ==

Börö da'ö ifa'anö Sirus Laia sambua ''draft'' sotöi ''Program Pengembangan Bahasa Nias di Era Digital 2020-2025'' nifaosatö tölu: ''dokumentasi, standardisasi'' ba ''promosi''.

Ena'ö aoha khö Ndraono Niha wangoguna'ö Li Niha moguna ua te'owuloi fefu ngawua wehede ba Li Niha (fefu wehede si fakhai ba hada, sinumbua, aurifö ba tanö bö'önia). Da'a nifotöi ''dokumentasi''.

Aefa da'ö moguna mufazökhi goi-goi saoha hewisa wama'oli ngaro wehede ba hewisa wanura ya'ia (''standardisasi'').

Baero da'ö moguna mufazökhi ''fakake'' same ena'ö aoha wanura ba Li Niha (''keyboard'' ma fafa wanura si so hurufo ö ba ŵ)<ref>[https://niaskeyboard.blogspot.com/ Proyek Keyboard Nias]</ref> börö me lö dombua hurufo andrö ba keyboard si fagölötö.

Töra moroi ba da'ö moguna göi nifotöi ''pabrik bahasa Nias'', ya'ia da'ö fangalui wehede moroi ba Li Indonesia si lö fangalinia ba Li Niha. Mu'alui wehede si no atua ba lö mu'oguna'ö sa'ae ma zui mamazökhi fehede si bohou ma zui muhalö moroi ba li tanö bö'ö simane Li Indonesia.

Awena ba waosatö si tölu moguna ''promosi'' Li Niha ba ''media sosial'', same ena'ö ''populer'' oi wehede si bohou andrö irege tebörögö la'oguna'ö ia niha.

''Draft'' program andrö tefahea khö ndra mato ha'uga niha me 16 Yuni 2020 ba sambua ''konferensi zoom''. Fao dödö fefu zi fao ba rafe andre ba wamörögö halöŵö andrö ba te'etu'ö göi wangalui ''media'' ba wangirö'ö fefu wehede ni'owuloi (''dokumentasi'') andrö. Fatua lö musöndra zabölö sökhi mu'oguna'ö ua Google Drive.<ref>[https://drive.google.com/drive/folders/1WUEqzPx6o7uzvzuushvi_ke0ODI7mGxl?usp=sharing Program Pengembangan Bahasa Nias 2020-2025]</ref>

Ba hiza oroma wa ''media'' andre ambö fagöna ba wamalua gohitö dödö program.

Lö ara aefa da'ö tefawu'a berkas-berkas moroi Google Drive andrö lumalö ba Wiktionary ba ba Wikipedia Li Niha. Me luo da'ö no so ba zosou'a (''tahap inkubator'') Wikipedia Li Niha, andrö wa ibörögö Sirus Laia wama'anö Wiktionary Li Niha. Furi hö tebörögö göi Wikibuku Li Niha. Ba hiza lö aefa gohitö dödö sebua moroi ba duduma hörö: '''mangoguna'ö Wiktionary, Wikipedia ba Wikibuku Li Niha tenga ha ba wangirö'ö ngawua wehede, ba hiza göi ba wangirö'ö (''dokumentasi'') fefu zanandrösa ba ''budaya'' ba ''sejarah'' Danö Niha'''.

Lö ara aefa da'ö oi monönö ira sangodödögö wangowuloi fehede ba Wiktionary ba sanura ngawalö zura ba Li Niha ba Wikipedia. Halöŵö andrö mowua ia me aboto Wiktionary/Wikipedia Li Niha moroi ba zosou'a tobali ''resmi'' me 13 Yanuari 2021 (proposal tetema'ö me 17 Desember 2020). Da'a ngaluo wa'atumbu ''resmi'' Li Niha ba Wikimedia/Internet: 13.01.2021! Ya'ahowu!