Thomas Cole

Teliz mal Wikipedia.
Thomas Cole
1801-1848
Amerikaf lingesik

Thomas Cole tiyir amerikaf lingesik.

Koe jotaf amerikaf vedey kuranira va redura va yambafa tegira meruptesa va Europa exaksawer. Ilamkaf is ware ketaf patectoy ke Warzafa Tamava va meropuskena koswavasa klita pu yambik firvid. Thomas Cole tiyir taneaf lingesik koaykayas va patectoymartig aptaf gu Amerika.

Blirizva[betara | va krent betá]

Jotaf kolamasik grutes va lingera[betara | va krent betá]

Thomas Cole ba 1-e ke toleaksat ke 1809 koe Bolton valenttalte Engla koblir. Jotaf vanpir ravesik dene gwetiasik ise gu zovdara va int kotaver. Bak 1818 inafa yasa va Tanarasokeem kolamar aze koe Ohio soka inkewer. Gadikye va rosiaxeme digir numen Thomas deneon toldon kobar. Azon vanpir avlotcaf deltusik ise va Ohio widavawidavon exuler voxen kiewatca me sokir.

Yasa bak 1823 ko Pittsburgh divsoker, voxen Thomas ko Philadelphia kalion mallakir lize gu yambacultim va int kobemar. Bata tazukara va tukiewara va inafe rotakafe ckane nover. Va patectoyafa lingera dere kosmar. Bak 1825 va yasa koinkeweyesa koe New York kazokever.

Taneafa kiewatca[betara | va krent betá]

Bak idulugal ke 1825, Cole va Hudson krant is Catskill fluvor lente New Yok widava exuler. Catskills tir eem dem cuisafa kusaruxafa venta, nume vanpir gelukaxo ke Cole. Koe Catskill wida mali 1827 va int parmon inker. Bal yona gozara, Cole va patectoy kan ogalt lorder aze ta puntatrutca koe lingexo di malsaver. Bata kobavesa nuva va nuyucapa nover. Cole va grupecken patectoy sagon rotarkar oke va gestan wiray roskur.

Inafa taneafa trutca kadime ralpoda ke William Coleman nevadolesik zo wonad. Dulapera ke John Trumbull gan fitc ke Thomas Cole zo sumpar nume va Kaaterskill Falls stoya ika 25 dollar talolk bak 1826 luster. John Trumbull ( 1756-1843 ) tir izvalingesik kaatoeyes va yona dalafa bifa ke geja ta volruptesuca az balemoy rebavaf lingeks ta Capitol cugexa ke Washington. Mana isterera nover da Cole va turestaf korobik ke yambafa tamava di kakever. Trumbull va ine pu Robert Gilmor dotayepesik ( 1774-1848 ) is Daniel Wadsworth ( 1771-1848 ) tulon atoer. Bristune gan Trumbull djumabduaskis va patectoyafa yamba ordon amerikafa, banvielu kulaf kumaskisik isu yambusik pu Thomas Cole belon jafad. To Hudson River School serna di vanblir.

Sposaf lingesik[betara | va krent betá]

Wali 1829 is 1832, Cole koe Europa koyar lize va tcilaxepe ke London az Paris az Firenze az Roma az Napoli. Denon, koe London va geltreva ke John Constable ( 1776-1837 ) is abdueva ke William Turner ( 1775-1851 ) norlaf abdifisik va liteva kosmar. Koe Paris, va yon pulukaf patectoy ke Nicolas Poussin ( 1594-1665 ) is Claude Lorrain ( 1600-1682 ) kosmar.

Bak 1836, Cole va Bali ke gindaxo tenuker, i va doca dem aluboya trutca. To purdaf patectoy kaatoes va milo xo ba aluboya amidafa rekola tid, mali Govitugal kali Vilarugal. Bata lidafa adala va patectoyafa lingera gan suteks ke francaf Volney trakopik zo koswavayar.

Bak santaneaksat ke 1836, Cole va Maria Bartow kurer. Tolonga va balemoy nazbeik wali 1838 is 1848 di kir.

Thomas Cole va grabomeem wanur, banvielu lyason va patectoy dem trakopafa staksa. Bak 1839 va balemoya trutca yoltkirafa gu Koyara ke Blira mu Samuel Ward omeltik skur. Va ayafa blira mali rumeugal kali guazugal lecon kaatoer.

Bak 1841/1842, i lingesik koe Europa gire koyar ise va Franca az Italia az Swiza exuler. Cole koe Tanarasokeem re tir sposafe ise pu yon jotaf yambik koe intafo lingexo ke Catskill taver : pu Frederic Church az Benjamin McConkey.

Thomas Cole klaafe gu balem-san-perda nope rizakola ba 11/02/1848 mulufter.

Trutca[betara | va krent betá]

Dere rupec[betara | va krent betá]

Trutceem ke Cole

Stragela[betara | va krent betá]

  • (en) Cole, Thomas. The Collected Essays and Prose Sketches. Ed. by Marshall Tymn. St. Paul, Minnesota: The John Colet Press, 1980.
  • (en) Legrand Noble Louis, The Life and Works of Thomas Cole, Black Dome Press, 1997 (ISBN 9781883789138)
  • (en) Myers, Kenneth, The Catskills: Painters, Writers, and Tourists in the Mountains, 1820-1895. Yonkers, New York: Hudson River Museum of Westchester, 1987, 1988
  • (en) Parry, Ellwood C., III, The Art of Thomas Cole: Ambition and Imagination. Newark, Delaware: University of Delaware Press, 1988.
  • (en) Robinson, Christine T, Thomas Cole: Drawn to Nature. With essays by John Stilgoe, Ellwood C. Parry III, and Francis F. Dunwell. Albany, New York: Albany Institute of History and Art, 1993

Ara vuestexa[betara | va krent betá]

Thomas Cole

Thomas Cole

 Koblira  01/02/1801,
 Bolton, Engla
 Awalkera  11/02/1848,
 Catskill, Tanarosokeem
 Vedeyot  Amerika
 Eba  Lingeropa
 Serna  Pestakeva, Hudson Bost serna
  Grabom 
  • The Course of Empire
  • The Oxbow
  Tuveli icde Lingeropa