@

@ („мајмунче“)^[1] — типографски знак. Се наоѓа во основните знаци на АСКИ кодот. Неговиот број е 64 во децималниот систем, односно 40 во хексадецималниот. Неговата употреба се поврзува пред сè со користењето во адресите на електронската пошта за одвојување на корисничкото име и доменот.

Име на знакот во македонскиот јазик

Овој знак во македонскиот јазик се чита на, често се користи и англицизмот ет (спрема англиското at), а најчесто се нарекува мајмунче.

Користење пред и вон сметачкиот свет

Употребата на симболот од страна на Константин Манасиј

Најраниот досега откриен симбол во овој облик се наоѓа во летописот напишан од Константин Манасиј во 1345 година преведен во црковнословенски јазик. Денес се чува во Апостолската библиотека во Ватикан и го содржи симболот @ во замена на буквата А како иницијал во зборот „Амин“; сепак, причината за неговата употреба во овој контекст е сè уште непозната. Еволуцијата на симболот како што се користи денес не е евидентирана. Оваа ознака долго била користена во шпанскиот и португалскиот јазик како скратеница од името ароба – единица за тежина еквивалентна на 25 килограми. Името потекнува од изговорот на зборот „четвртина“ на арапски јазик. Првиот историски документ кој го содржи знакот @ е шпански регистар на пратки пченица од Кастиља во Арагон од 1448 година.

Комерцијалната употреба на симболот @ била со значење „секоја по“, односно „по стапка од“ во означување на цените. На пример, трошоците „12 јаболка @ 2 долари“ ќе бидат 24 долари.

Современа употреба

Е-пошта

Во адресата на електронската пошта (која се пренесува преку SMTP), знакот @ се вметнува меѓу корисничкото име и доменот, како на пример:

[email protected]

корисничкото име е „sorabotnik“ и се наоѓа на доменот „mk.wikipedia.org“.

Сè уште не е можно да се користи електронска пошта со кирилски знаци. Често симболот @ се заменува со слика или со зборот НА во е-поштенските адреси, за да се избегне несакана пошта, како на пример на контактните страници на Википедија.

Разговори и форуми

Симболот @ на форумите често се користи како ознака на обраќање кон одредена личност. На пример, ако во дискусијата учествуваат повеќе личности и напишеме @Филип, пораката која следи му е наменета на корисникот Филип:

Фросина: Добар ден! Филип: Немаме статија за знакот @ Благоја: Здраво Фросина, ти ја пратив сликата на е-пошта. Фросина: Ја примив твојата е-пошта. @Филип: немаш скоро погледано, еден соработник само што напиша статија за знакот @

Програмирање

Симболот @ се користи во многу програмски јазици, но неговата употреба не е стандардизирана и има различно значење кај различни јазици.

C# - овозможува клучните зборови да се користат како идентификатори и за обележување на посебни видови стрингови
Java - од верзијата 5.0 се користи за означување на видот на метаподатоци
Pascal - @ е оператор кој значи „адреса на променливата“, т.е. говори за мемориската локација на која е сместена променливата
Perl - @ им претходи на променливите кои содржат низи
PHP - се користи пред изрази за да се потисни евентуална грешка која би се генерирала со тој израз
FoxPro - се користи да означи експлицитно проследување на променливи при повикување на процедура или функција (но тоа не е оператор на адресата).
Windows PowerShell - @ се користи како оператор за низи податоци.

Тастатура

На тастатура со стандарден англиски (американски) распоред на знаците, @ се наоѓа над цифрата 2, и се добива со притискање на копчето SHIFT и цифрата 2. На тастатурата со македонски распоред знакот @ се добива со притисок на десното ALT копче и копчето V.

Имиња на знакот на други јазици

Симболот @ на разни јазици има различни вообичаени називи. Доста јазици го имаат прифатено англискиот изговор, а останатите имиња главно се варијанти на буквата А или имиња на животни (мајмун, слон,...).

баскиски - замотан
белоруски - спирала, полжав
бугарски - мајмун, уво
чешки и словачки - се нарекува по името на јадењето од свиени харинги (завинач)
дански - сурла
холандски - мала мајмунска опашка
германски – пајак-мајмун
грчки - пајче
унгарски - црв
италијански - полжав
казашки – месечинско уво
норвешки – кадрава алфа
руски - пес

Поврзано

Електронска пошта

Наводи

↑ Цветковски, Живко (2017). Правопис на македонскиот јазик (PDF). Скопје: Институт за македонски јазик, Култура. стр. 145. ISBN 978-608-220-042-2, 978-9989-32-900-5 Проверете ја вредноста |isbn=: invalid character (help). Посетено на 4 февруари 2025. Укажано повеќе од еден |pages= и |page= (help)

Надворешни врски

"The Accidental History of the @ Symbol ", Smithsonian magazine, September 2012, Retrieved June 2013.
The @-symbol, part 1, intermission, part 2, addenda, Shady Characters ⌂ The secret life of punctuation August 2011, Retrieved June 2013.
"Daniel Soar on @", London Review of Books, Vol. 31 No. 10, 28 May 2009, Retrieved June 2013.
ascii64 – the @ book – free download (creative commons) – by patrik sneyd – foreword by luigi colani) Архивирано на 20 јануари 2007 г. November 2006, Retrieved June 2013.
A Natural History of the @ Sign The many names of the at sign in various languages, 1997, Retrieved June 2013.
Sum: the @ Symbol Архивирано на 16 септември 2014 г., LINGUIST List 7.968 July 1996, Retrieved June 2013.
Where it's At: names for a common symbol World Wide Words August 1996, Retrieved June 2013.
UK Telegraph Article: Chinese parents choose to name their baby "@" August 2007, Retrieved June 2013.
Tom Chatfield tells the story of the @ sign on Medium

[1] Цветковски, Живко (2017). Правопис на македонскиот јазик (PDF). Скопје: Институт за македонски јазик, Култура. стр. 145. ISBN 978-608-220-042-2, 978-9989-32-900-5 Проверете ја вредноста |isbn=: invalid character (help). Посетено на 4 февруари 2025. Укажано повеќе од еден |pages= и |page= (help)

[1]