Assarhaddon
Assarhaddon es un sobeiran assirian que reinèt de 680 a 669 avC. Succediguèt a son paire, Sennacherib (705-681 avC), e foguèt remplaçat per son fiu Assurbanipal (668-626 avC). Son rèine s'incriu dins lo periòde de dominacion de l'Empèri neoassirian en Orient Mejan dei sègles VIII e VII avC.
Designat coma successor de son paire en 683 avC, deguèt luchar còntra sei fraire per prendre lo poder après l'assassinat de Sennacherib. Durant son rèine, mantenguèt la poissança assiriana. En Mesopotamia, adoptèt una politica pus concilianta amb Babilònia e financèt la reconstruccion de la vila, especialament aquela dau temple de Marduk destruch per son paire. Dins lei monts Taurus, luchèt còntra lei pòbles nomadas originaris de l'estèpa e capitèt de leis arrestar. Enfin, reprimiguèt d'insureccions sostengudas per leis Egipcians en Fenicia (Sidon, Tir, etc.). Puei, contuniant sa campanha a l'oèst, conquistèt lei regions bassas d'Egipte en 671 avC. Pasmens, après la partença de son armada, leis Egipcians se revoutèron. Preparèt una expedicion novèla còntra lo país, mai moriguèt avans la començament de la campanha.
Assarhaddon organizèt tanben sa succession per defugir una guèrra civila a sa mòrt. Chausiguèt son fiu Assurbanipal coma successor e placèt son fiu ainat Shamash-shum-ukin sus lo tròne de Babilònia. Son objectiu èra d'estabilizar la dinastia e de contentar lo desir d'autonòmia de Babilònia. Aquò foncionèt durant 15 ans après sa mòrt, mai s'acabèt per una violenta guèrra civila entre lei dos fraires.
Liames intèrnes
[modificar | modificar lo còdi]Bibliografia
[modificar | modificar lo còdi]- (fr) Francis Joannès, La Mésopotamie au Ier millénaire avant J.-C., París, Armand Colin, coll. « U », 2000.
- (fr) Pierre Villard, « Assarhaddon », dins Francis Joannès (dir.), Dictionnaire de la civilisation mésopotamienne, París, 2001, pp. 82-84.