Elwedritsch

Die Elwedritsch (aa Elwetritsch, Ilwedritsch, Elbedritsch, Plural Elwedritsche oder Elwetritschlicher) iss en Gedier, ass en wennich guckt wie en Hinkel. Es hot awwer aa Fiess vun en Ent odder en Gans un deel Zeit en Kopp, ass guckt wie en Katz.

Was en Elwedritsch rielli iss

Fer dausende vun Yaahre waare die Mensche bang, wann sie ins Bett gange sinn am Owet. Deel Zeit sinn Bobblicher (Babys) gschtarewe in ihr Bedder, deel Zeit sinn alte Leit mariyets nimmie wacker warre. Die Leit henn gemeent, en "demon" deet kumme middes in die Nacht, ins Bett neischteige vum Fuss End her un sich hocke uff die Bruscht vun en Kall odder Weibsmensch, ass am schloffe iss. "Drotterkopp" (odder "Druddekopp") henn die Leit gsaat zu seller demon. Sie henn browiert fer seller demon fatt halde mit Pentagrams, Hexagrams un Symbols wie sell - un sie henn abbadiche Schprich gsaat, fer seller demon mit Wadde fatthalde. Es bescht bekannt Schruch iss der "Drotterkopp-Schpruch", ass mer finne kann in unnerschiddliche Braucherei-Bicher in Pennsylvaani. Die deitsche Leit im Alte Land henn en noch en anner Naame ghatt fer der "Druddekopp". "Albdrude" henn sie seller demon genennt. Un fer sell demon glee mache, henn die Leit sell "Albdrude" erscht "Albedrudche" un "Elbedrudsche" un am End "Elbedritsch" odder "Elwedritsch" genennt. Wie sie sell geduh ghatt henn, henn sie nimmie gedenkt an an gefaehrlicher Demon, yuscht noch en glee Wese, ass geguckt hot wie en Hinkel mit Fiess vun en Ent odder Gans, en Kopp vun en Katz un verleicht Hanner am Kopp. Un sell glee Gedier henn sie in der Wald fatt geyagt. En Weil schpeeder henn sie gschtaert, Leit mitnemme uff en "Elbedritsch Yacht". Sell waar verleicht fer die anner Leit wennich fuuhle - awwer was sie aa noch geduh henn iss: Sie henn schur gemacht, ass die "control" henn iwwer die Elbedritsche - un net der anner Weg rum.

Wie mer Elwedritschlicher yaagt

Die Yaager gehne zamme schpoot am Owet in der Busch mit Ladanne un en groosser Sack. Een Kall, wu verleicht noch nie net Elwedritschlicher hunte waar, iss weider zu nix zu gebrauche. Er muss yuscht der Sack hewe un hot der schmaertscht Tschabb. Die annere Yaager gehe fatt mit die Ladanne un dreiwe die Elwedritschlicher zu der Sack. Der Kall mit der Sack muss seller yuscht noch schnell zumache. Awwer etliche Mol haeppent's, ass die Yaager sich uff 'em Weg verliere un nimmi zerick finne zu der Kall, wu der Sack hebt. Wann sie glicklich sinn, finne sie verleicht ariyets en Wattshaus, un datt duhne sie ebbes gehich ihr groosser Dascht. Un wann sie genunk gedrunke henn, vergesse sie der Kall mit der Sack, wu als noch im Busch schteht un uff die Elwedritschlicher am waarte iss.

Was mer lanne kann vun selli Schtori

Die Leit henn en latt Yaahre zerick aa en latt Angscht ghatt. Abbadich gfaehrlich waar die Zeit, wann die Mensche gschlofe henn. En latt hot kenne gschehne darich selli Zeit. Heit wisse mer, ass es ebbes gebt, ass "sleep paralysis" heesst. Deel Leit schwetze vun "sleep demons", ass Leit sehne kenne, ass yuscht am wacker warre sinn - awwer ihr Hend un Fiess noch net riehre kenne. Kopp un Kareber warre net wacker die seeme Zeit. Wann sell haeppent, schpiere deel Leit, es iss verleicht ebber un die Schtubb, hockt sich uff die Bruscht un drickt so fescht, ass er kann - so ass der odder die, ass am schlofe iss, neegscht nimmie schnaufe kann. Seller demon henn die Leit "Albdrude" gheesse, schpeeder "Druddekopp" (odder "Trotterkopf"). Fer die Angscht los warre henn sie seller demon so glee gemacht, ass sie gekennt henn: Noht waare die Elbedritschlicher gebore. Un selli henn die Leit fatt in der Busch geyagt, weit fatt vun die Mensche.

Literature

Behnke, Thomas: Michael Werner über sein neues Hiwwe-wie-Driwwe-Buch „Elwedritsche - Dunkle Gefährten“: Schlafdämonen sind des Pudels Kern. In: LEO Freizeitmagazin, January 16, 2025.
Behnke, Thomas: Ein Gespenst, das den Albdruck erzeugt: Michael Werner schreibt über Elwedritsche. In: rheinpfalz.de, January 17, 2025.
Benss, Timo: Was Elwetritsche mit Albträumen zu tun haben. In: Rheinpfalz am Sonntag, December 14, 2024.
Donmoyer, Patrick J.: Hex Signs - Myth and Meaning of the Pennsylvania Dutch Barn Stars. Kutztown (PA) 2013.
Donmoyer, Patrick J.: Powwowing in Pennsylvania. Braucherei & the Ritual of Everyday Life. Kutztown (PA) 2018.
Werner, Michael: Elbedritsche - Die Auflösung des ewigen Rätsels. In: Hiwwe wie Driwwe - Der Pennsylvania ReiseVERführer. AGIRO Verlag (Neustadt an der Weinstraße) 2021: 148-153. ISBN 978-3-946587-34-7
Werner, Michael: Geheimnisvolle Pfalz - Zwischen den Welten. In: VielPfalz 6/2023: 16-33.
Werner, Michael: Elwedritsche – What they really are. In: hiwwe-wie-driwwe.com. Published on November 25, 2024.
Werner, Michael: Elwedritsche - Dunkle Gefährten. AGIRO Verlag (Neustadt an der Weinstraße) 2025. ISBN 978-3946587781.
Yoder, Don & Graves, Thomas E.: Hex Signs - Pennsylvania Dutch Barn Symbols & Their Meaning. Stackpole Books 2000 (2nd edition).

External links

Guuck aach

Es Elbedritsch

Commons: Elwetritsch – Pikder, Videos unn/odder Audiofeils