Graof

De kroen, of Fürstenhut, vaan graove zoewie gebruukelek in de gebeeje die vreuger loge in 't Heileg Roems Riek, de Habsbörgse monarchie, 't Fraankriek en de Lieg Len - wie dus ouch de Limbörge. Ouch gebede die betrèkkelek wied vaan Wes-Europa aofligke, wie 't Rössisch Riek, hanteerde de Fürstenhut en de graofstitel.

'ne Graof, of 'n Graovin in de vrouweleke vörm, is 'ne adeltitel dee in de meiste Europese len weurt touwgekind of historisch woort touwgekind.

In 't Fraankisch Riek ('t riek wat groetdeils 't allewijl Duutsland, Fraankriek en Bènelux besleit) waore graove oersprónkelek keuninkeleke ambtenere die keuninklek soevereiniteit oetoefende in graofsjappe. Sjarel de Groete introduceerde de graofsjapsgroondwèt, boebij 't bestuur vaan 't riek veurnaomelek in de hen vaan de graove loog.

Nao verloup vaan tied woorte de graofsjappe erfelek en woorte oonderdeil vaan 't feodaol systeem. In de late Middeliewe woort de graofstitel 'ne adeltitel, en de graove woorte oonderverdeild in hoege en liege adel. Nao 't ind vaan 't Heileg Roems Riek in 1806 woorte de federaol vorste soeverein en kóste ze adel verliene. Nao de aofsjaffing vaan de adelleke rechte in 1919, woorte adelleke titels oonderdeil vaan de naam.

De Aajdhoegduutse vörme grafio en gravo komme woersjijnelek oet 't Middellatien graffio vaan 't Byzantijns-Aajdgrieks grapheus of sjriever. De Latiensen term is aofgeleid, boe-oet de aander taolbenaominge vaan dezelfde nobele rang zien aafgeleid (Frans comte/comtesse, Ingels count, Italiaans conte/contessa, Spaons conde/condesa, enzoewijer), beteikent lètterlek confreer ofwel vrund (vaan de keuning). In de late Roemeinsen tied woorte versjèllende belaangrieke houffunctionarisse, meh ouch regionaal militair aonveurders, comites geneump.

Brón

• Dit artikel is gebaseerd op de oetgebreier variant vaan 't artikel Graf vaan d'n Duitstaolege Wikipedia