Groppo
ZE
|
Sta pagina a l'é scrita in zeneise, segondo a grafia unitäia |
Un groppo o l'é unna struttua fæta d'uña ò ciù còrde ò atri oggetti flescibili con forma de fî (comme cavi, çenge, piccagge e cadeñe) intressæ tra de lô ò con di atri oggetti, de mainea che no pòssan desligâse da soli con façilitæ.
A fonçion de un groppo a peu ëse de fissâ unna còrda à unn'atra ò à un oggetto, ò de ligâ di oggetti tra de lô, ò ancon de cangiâ e propietæ da còrda mæxima.
Descriçion
[modìfica | modìfica wikitèsto]Pe accapî e descriçioin di groppi e ëse boin à descrivili, avei unna nomenclatua scistematica o l'é importante[1][2].
A parte da còrda co-a quæ se travaggia e ch'a se mescia a l'é dita o cavo corrente. Incangio, se gh'é unna parte ch'a no se mescia guæi (perché a pòrta o carrego, ò perché a l'é assæ longa), se ghe dixe cavo fisso.
C: mezo còllo, vòtta;
D: vòtta rionda;
E: doe vòtte rionde.
A-a base da ciù parte di groppi gh'é o mezo còllo, ch'o s'ottëgne con unna rotaçion de 270° pöcassæ do cavo corrente d'in gio a-o cavo fisso (stæto fæto o mezo còllo, se peu realizzâ un groppo sencio con passâ o cavo corrente drento da gassetta che s'é formou). Quande a rotaçion a l'é de 360° se parla de còllo. De spesso, dæto che e differense tra còllo e mezo còllo no en importante, sti doî termini en addeuviæ comme scinònimi.
Se un mezo còllo o l'é formou d'in gio à un oggetto fisso, se ghe dixe vòtta. Quande, stæto formou unna vòtta, se continua con unna rotaçion completa e se pòrta o cavo corrente torna parallelo a-o cavo fisso (saiva à dî, unna rotaçion de 540° in tutto), s'ottëgne unna vòtta rionda. Se se gh'azzonze un atro gio completo, con portâ torna o cavo corrente parallelo a-o cavo fisso, s'ottëgne doe vòtte rionde.
Uxi
[modìfica | modìfica wikitèsto]Un di campi prinçipæ d’appricaçion o l'é a navegaçion: i groppi en deuviæ inte maneuvre corrente (scòtte, drisse), pe l'ormezzo, o tonnezzo, e de vòtte pe-e maneuvre fisse ascì.
Se deuvia i groppi ascì inte tante atre attivitæ donde e còrde an un ròllo primmäio, comme l'arpinixmo, a speleologia e l'erboicoltua.
Sciben che inte tante appricaçioin l'uzo di groppi o l'é in scî pissi de scentâ a-o guägno d'instrumenti speçializzæ, a conoscensa di groppi a l'arresta importante pe tante attivitæ, mascime inte scituaçioin d'urgensa e pe-e tecniche de sarvataggio, quande l'improvvisaçion a l'é neçessäia.
Clascificaçion
[modìfica | modìfica wikitèsto]A clascificaçion di groppi a l'é basâ in sciâ seu fonçion. E categorie prinçipæ son:
- i groppi d'azzonta, pe azzonze doe còrde tra de lô (groppo da ræ ò de bandea, groppo do pescou);
- i groppi d’ingancio, fæti intressando unna còrda in sce un oggetto pe fissâghela (groppo parlâ, groppo de l'ancoa, vòtta rionda e doî mezi còlli);
- i groppi fascianti, deuviæ pe tegnî assemme un ò ciù oggetti (groppo cian);
- e gasse, che forman un ò ciù anelli de dimenscion fissa (gassa d'amante, gassa à eutto);
- i groppi de arresto, che forman in sciâ còrda un volumme de diametro ciù grande de quello da còrda mæxima, co-a fonçion d’arrestâla quand’a passa pe unna taggia ò unna gassetta (groppo sencio, groppo à eutto).
Notte
[modìfica | modìfica wikitèsto]- ↑ (LIJ, IT) Marco Cuneo e Giulia Petracco Sicardi, Vocabolario delle parlate liguri. Lessici speciali 2-II: mare, pesca e marineria, Zena, SAGEP, 1997.
- ↑ (IT) Giulio Mazzolini, Elementi di un nodo, in I nodi indispensabili in barca, Accademia adriatica internazionale della vela, 2005.
Atri progetti
[modìfica | modìfica wikitèsto]
Wikimedia Commons a contêgne di files in sce groppo
| Contròllo de outoritæ | LCCN (EN) sh85072727 · BNF (FR) cb11932591g (data) |
|---|