M2 Hyde

M2 Hyde-Inland
	; ; Ur bistolenn-vindrailher M2 Hyde
Kinnig
Bro	Stadoù-Unanet Amerika
Doare	Pistolenn-vindrailher aotomatek/damaotomatek
Mont en-dro	Tennata dre argil
Munisionoù	.45 ACP
Krouerien	George Hyde, General Motors
Produer	Marlin Firearms
Mare produiñ	1942 - 1943
Niver produet	War-dro 400
Pouez ha muzulioù
Mas hollek	4,19 kg
Hirder	813 mm
Hirder ar c'hanol	305 mm
Perzhioù all
Lusk-tennañ teorikel	570 tenn/mn
Tizh o vont e-maez	292 m/s
Endalc'h	Kargerioù-fiñv Thompson 20 pe 30 kartouchenn
Lezenn
Rummad e Bro-C'hall	A

An M2 Hyde-Inland zo ur bistolenn-vindrailher ijinet er Stadoù-Unanet evit ezhommoù arme ar vro da vare an Eil Brezel-bed. Ne servijas ket war an dachenn koulskoude, hag ur 400 skouerenn bennak anezhi a voe produet nemetken.

Istor ha deskrivadur

Pa grogas ar Stadoù-Unanet en Eil Brezel-bed e 1941 e oa pourveziet o arme gant pistolennoù-mindrailher Thompson hepken. Koustus ha ponner e oant siwazh, ha klask a reas an arme lakaat sevel pistolennoù-mindrailher all. Fiziet e voe al labour ijinañ e rann Inland an embregerezh General Motors. Adimplijout ha gwellaat a rejont neuze un arm bet breouet gant an ijinour George Hyde e 1935^[1], dezhañ ur sistem tennata dre argil, skañvoc'h evit an Thompson, ha resisoc'h da vare an tennoù a-dennadegoù. Kambret e oa e .45 ACP. Gellet a rae tennañ e mod aotomatek pe damaotomatek^[2]. Pourveziet e oa gant ar memes kargerioù evit an Thompson.

An arm, anvet Hyde-Inland 1, a voe amprouet gant Rann an Ordrenañs e miz Ebrel 1942. Gwelladennoù a voe degaset warnañ diwar se, hag un eil stumm anvet Hyde-Inland 2 a voe amprouet. An holl amprouennoù a ziskouezas e oa fiziaploc'h ha resisoc'h evit an Thompson^[2]. Skañvoc'h e oa ivez, marc'hadmatoc'h hag aesoc'h da broduiñ. Dre ma oa beuzet Inland gant produiñ ar c'harabinennoù M1 nevez, ar gouarnamant stadunanat a sinas ur gevrat gant Marlin Firearms evit ober 164.500 skouerenn eus ar bistolenn-vindrailher nevez, dindan an anv M2.

An embregerezh Marlin ne vestronie ket mat an teknikoù erbedet gant Inland evit sevel pezhioù metalek zo eus an M2 Hyde, setu e tiskouezas an armoù kentañ produet bezañ izeloc'h o c'halite evit hini ar pimpatromoù. Dre se e vo daleet ar produerezh, hag ar skouerennoù kentañ a voe resevet e miz Mae 1943 gant an arme hepken. Etretant e oa bet savet ur bistolenn-vindrailher all gant George Hyde ha Frederick Sampson e General Motors, diwar c'houlenn Rann an Ordrenañs ivez, deuet da vezañ an M3 "Grease Gun".

Gant donedigezh an M3 e tivizas an arme nullañ ar gevrat evit an M2 e miz Even 1943. 400 skouerenn anezhi a voe produet hepken, ha ne voe ket implijet da vat en emgannoù. Lod anezho a voe distrujet^[2]. Un arm ral eo hiziv an deiz, priziet gant an dastumerien.

Levrlennadur

(en) CANFIELD Bruce N., U.S. Small Arms of World War II, Andrew Mowbray Publishers, Inc., 2020, 864 p., ISBN 978-1931464864

Liammoù diavaez

(en) America's Forgotten SMG: The Hyde/Marlin M2, war ar chadenn Forgotten Weapons, 14'24, 2019

Daveennoù

↑ (en) CANFIELD Bruce N., The Forgotten M2 Submachine Gun, American Rifleman, 01/05/2017 (lennet d'an 12/05/2025)
↑ ^2,0 ^2,1 ha^2,2 (en) PIKE Travis, The M2 Hyde: This Submachine Gun was Ahead of Its Time, The National Interest, 19/12/2023 (lennet d'an 13/05/2025)

Stag eo ar bajenn-mañ ouzh Porched an Armoù-tan

[1] (en) CANFIELD Bruce N., The Forgotten M2 Submachine Gun, American Rifleman, 01/05/2017 (lennet d'an 12/05/2025)

[:0-2] 2,0 ^2,1 ha^2,2 (en) PIKE Travis, The M2 Hyde: This Submachine Gun was Ahead of Its Time, The National Interest, 19/12/2023 (lennet d'an 13/05/2025)

[1]

[2]