Niue

Bandera Niue

Niue adolah nagara kapulauan nan mamarintah surang jo marupokan bagian dari Selandia Baru. Nagara ko talatak di Lautan Pasifik Selatan jo marupokan bagian dari Polinesia. Sabagai salah ciek pulau karang tagadang di dunia, jo laweh sakitar 261,46 kilometer persegi, nagara ko acok disabuik "The Rock", nan baasa dari namo tradisional "Rock of Polynesia". Ibu kota nagaranyo iolah Alofi.

Urang Polinesia dari Samoa manatap di Niue sakitar tahun 900 M. Pamukim salanjuiknyo datang dari Tonga pado abaik ka-16. Hinggo abaik ka-18, nagara tu nampaknyo indak mampunyoi pamarentahan nasional, kapalo suku jo kapalo kaluarga manjalankan wewenang ateh panduduaknyo. Baru kamudian muncua rajo nan disabuik patu-iki sarato Tui-toga marupokan rajo patamo nan mamaluak Kristen. Urang Eropa patamo nan mancaliak Niue iolah James Cook pado tahun 1774. Inyi malakuan tigo kali upaya balabuah, tapu ditolak dek panduduak asali. Nyo manamoi pulau tu Pulau Savage. Pado tahun 1889, para pamimpin pulau tu mamintak ka ratu Baritania Rayo, Ratu Victoria, untuak manjadi wilayah koloninyo agar aman, nan kamudian Niue digabuang jo Selandia Baru. Kamudian pado tahun 1974, pamarintah Selandia Baru mamuliahan pamarentahan surang Niue.

Politik Niue balansuang dalam karangko katagantuangan demokrasi perwakilan parlementer, dimano Kapalo Mantari adolah kapalo pamarentahan, jo sistem non-partisan. Sadangkan kapalo nagara dipacik dek Rajo Selandia Baru nan diwakian dek Gubernur Jenderal Selandia Baru. Kuaso legislatif dipacik dek Majelis Niue nan tadiri dari 20 anggota, 14 dipiliah dek satiok daerah pamiliahan kampuang jo 6 dek kasadoan urang nan tadaftar. Paradilan independen dari eksekutif jo legislatif, maliputi Pangadilan Tinggi jo Bandiang, sarato Komite Paradilan Dewan Panasihat di London.

Pado hasia sensus tahun 2022, panduduak Niue bajumlah 1.681 jiwa, nan jauah bakurang dari hasia sensus tahun 1966 nan bajumlah 5.194 jiwa. Antaro 90% jo 95% panduduaknyo tingga di Selandia Baru. Nagara ko marupokan nagara bilingual, di mano 30% panduduaknyo mangecek jo bahaso Inggirih sarato Niue, 11% bahasa Inggirih sajo, jo 46% Niue sajo. Kalompok etnis di nagara ko sabagian gadang urang Niue (65,4%), jo 14% satangah Niue sarato sisonyo non-Niue tamasuak 14% panduduak Kapulauan Pasifik, 6,6% lainnyo takah Eropa jo Asia. Sabagian gadang panduduaknyo maanuik agamo Kristen.