Taylor Swift

den
Reizh pe jener	plac'h
Bro ar geodedouriezh	Stadoù-Unanet
Anv e yezh-vamm an den	Taylor Swift
Anv ganedigezh	Taylor Alison Swift
Anv-bihan	Taylor
Anv-familh	Swift
Lesanv	Nils Sjöberg
Deiziad ganedigezh	13 Kzu 1989
Lec'h ganedigezh	West Reading
Tad	Scott Swift
Mamm	Andrea Finlay
Breur pe c'hoar	Austin Swift
Kar	Marjorie Finlay
Yezh vamm	saozneg
Yezhoù komzet pe skrivet	saozneg
Tachenn labour	country music, sonerezh pop
Bet war ar studi e	Hendersonville High School, Wyomissing Area Junior/Senior High School
Lec'h annez	Nashville
Lec'h labour	Nashville
Deroù ar prantad labour	2003
Relijion	kristeniezh
Perzhiad e	Conflict between Taylor Swift and Kanye West, Ice Bucket Challenge
Voice type	mezzo-soprano
Pladennrolladur	Taylor Swift discography
Oberenn heverk	Shake It Off, Anti-Hero, Cruel Summer, Blank Space
Ezel eus	Silence Breakers
Label sonerezh	Big Machine Records, Republic Records, Universal Records
Bet kinniget evit	Grammy Award for Album of the Year, Grammy Award for Best New Artist
Lec'hienn ofisiel	https://taylorswift.com
Dileuriad ar gwirioù a aozer	Broadcast Music, Inc.
Rummad tost	Category:Films directed by Taylor Swift
Fandom	Swifties
Roll elfennoù	list of awards and nominations received by Taylor Swift

Taylor Alison Swift, bet ganet d'an 13 a viz Kerzu 1989 e Reading (Pennsylvania, Stadoù-Unanet Amerika), zo un aktourez hag ur ganerez-sonaozerez stadunanat. Sevel ha kanañ a ra kanaouennoù a-ziwar he buhez. Un arzourez bras-bras he brud hag he levezon eo en deiz hiziv : ar sonerez he deus graet berzh ar muiañ eo en XXIvet kantved, gant he zonioù, he videoioù koulz hag he sonadegoù.

Bugaleaj

Anvet eo bet Taylor gant he zud abalamour d'ar soner folk-rock James Taylor. E Pennsylvania eo bet desavet gant ur familh katolik, hag e laz-kanañ ar barrez e kane asambles gant he mamm-gozh. Sachet eo bet Taylor vihan gant ar marc'hegañ da gentañ, gant ar c'hoariva da c'houde ha gant ar sonerezh country da echuiñ. Krog eo da ganañ hec'h-unan da-geñver abadennoù a bep seurt : foarioù, gouelioù, ostalerioù, kenstrivadegoù... Pa oa 14 vloaz e kuitaas he zad e labour gant ar soñj da sikour e verc'h da reiñ lañs d'he c'harierenn : mont a reas ar familh Swift da vevañ e Tennessee, nepell diouzh Nashville, abalamour ma oa kêr-benn ar muzik country.

Penn-kentañ he sonerezh

E 2005, da 15 vloaz, he doa sinet gant al label Big Machine Records, daoust ma oa bet skoazellet gant RCA Records da gentañ. Da gomañs e savas div bladenn tonioù country warno, Taylor Swift e 2006 ha Fearless e 2008. Teir c'hanaouenn anezho – "Teardrops on My Guitar", "Love Story" ha "You Belong with Me" – a yeas da single-ioù skignet gant radioioù country ha pop. Er Stadoù-Unanet e voe gwerzhet ur milion a skouerennoù eus he fladenn gentañ dindan vloaz ; evit an eil e voe an albom gwerzhet ar muiañ eno e 2009. Tamm-ha-tamm e pellaas diouzh ar country hag e cheñchas he brud evit mont war-du tonioù rock (gant ar bladenn Speak Now e 2010), electro (gant Red e 2012) ha synth-pop (gant 1989 e 2014). Evel krampouezh e voe gwerzhet ar bladenn Reputation, a zeuas er-maez e 2017, gant tonioù anat levezon an hip-hop warno. Meur a ganaouenn eus ar bladenn-se a voe renket da gentañ single er Billboard : "We Are Never Ever Getting Back Together", "Shake It Off", "Blank Space", "Bad Blood" ha "Look What You Made Me Do".

E 2018 e sinas Taylor Swift ur gevrat gant al label Republic Records. Betek-henn he deus savet pemp pladenn gant an ti-embann-se : unan electropop e 2019 (Lover), div kentoc'h indie folk er memes bloaz e 2020 (Folklore hag Evermore), ha div pop penn-da-benn (Midnights e 2022 ha The Tortured Poets Department e 2024). Gant ar pladennoù-se ivez he deus tapet kentañ plas ar Billboard meur a wech er bloavezhioù 2020, gant "Cardigan", "Willow", "All Too Well", "Anti-Hero", "Cruel Summer", "Is It Over Now?" ha "Fortnight".

C'hwec'h troiad sonadegoù he deus graet Taylor Swift en he buhez, en o mesk an hini vrasañ bet aozet a-viskoazh, anvet The Eras Tour (2023–2024). Er Stadoù-Unanet e voe peurwerzhet an holl dikedoù evit an droiad-se dindan 24 eurvezh.

He vrud

Deuet eo Taylor Swift da vezañ unan eus an arzourien brudetañ, pinvidikañ ha galloudusañ er bed-holl. Gwerzhet he deus muioc'h evit 50 milion a bladennoù en holl – gant 32 milion e Stadoù-Unanet Amerika – ha 150 milion a single-ioù. Swift zo neuze unan eus ar gwellañ gwerzherien pladennoù er bed hag en istor. 1,6 miliard a zollarioù he defe gounezet gant he muzik hepken. Prizioù a-leizh zo aet ganti, evel da skouer 14 Grammy Award, 29 American Music Award ha 23 Billboard Music Award. Meur a rekord he deus tapet ivez, evel er bloaz 2023, pa oa renket pemp eus hec'h albomoù e-mesk top 10 ar pladennoù gwerzhet ar muiañ. Taylor Swift zo bras he brud hag he berzh abalamour ma oar mat-tre kehentiñ hag ober gant ur strategiezh marketing efedus. Gouzout a ra diouzh an doareoù skignañ nevez evel ar streaming, ha peurlipat a ra hec'h oberennoù evito, evel ar c'hlipoù bep taol ma embann tonioù nevez. Heuliet hag harpet e vez he labour gant ar Swifties, evel ma vez graet eus he fanbase, da lavaret eo eus an dud sot-pitilh gant he muzik. Kalz e vez maget brud an arzourez gant ar mediaoù, a embann forzhik traoù diwar-benn he buhez pemdez.

E 2023 e voe dilennet Taylor Swift da « bersonelezh ar bloaz » gant Time Magazine, rak estreget bed ar sonerezh he deus krog warnañ : bras eo he levezon war ar gevredigezh dre vras, dreist-holl er Stadoù-Unanet. An dra-se zo kaoz e voe graet kalz anv eus he savboent war an dachenn bolitik, pa c'houlennas gant ar re yaouank mont da votiñ, pe pa savas a-du gant Joe Biden e 2020 ha Kamala Harris e 2024.