Typst

Typst

Typst網上編輯器嘅螢幕截圖
原作者	Martin Haug、Laurenz Mädje
開發者	Typst GmbH
初始版本	2023年3月21號 (2023-03-21)
最新發布	0.13.1（2025年3月7號; 穩定版本）
程式語言	Rust
平台	跨平臺
軟件類別	排版
許可協議	Apache-2.0
網站	typst.app
庫	github.com/typst/typst

Typst（/taɪpst/）係一個基於標記語言嘅開源排版系統，專為撰寫同排版學術文章、數學公式而設​——​只係加啲簡單嘅標記就做到一般嘅格式化，又可以自訂函數，又內建手稿語言（scripting language）同數學排版功能。

Typst 嘅主體係一個用 Rust 寫，以Apache特許條款2.0發佈 嘅離線排版程式（設計者叫佢做編譯器）；由一間同名嘅有限公司（Typst GmbH）負責維護、開發以及技術支援。呢間公司亦營運一個類似 Overleaf 嘅協作式網上編輯器，俾用戶一邊寫，一邊預覽成果，亦支援多人協同合作功能；但係網上編輯器並唔係好似主體咁係開源軟件，而係專有軟件，不過除咗提供收費服務之外，亦提供免費服務。

歷史

2019年，Laurenz Mädje 同 Martin Haug 開始開發 Typst，並喺2022年作為佢哋喺柏林工業大學嘅碩士論文題目發表。2023年3月，Typst 以開源軟件嘅形式發佈，目前處於Beta測試階段。

排版系統

Typst 係一種標記語言，類似 Markdown，佢設計目標係要「好似 LaTeX 咁強大，但更加容易學習同使用」。效能方面，Typst 編譯速度遠勝 LaTeX，一般只需幾毫秒，而唔係好似 LaTeX 咁需要好幾秒。佢嘅編譯器利用約束性記憶化（constrained memoization）實現增量編譯，每次只需要重新編譯更改咗嘅代碼，節省時間。

同 LaTeX 唔同，Typst 系統內置咗好多功能，所以唔需要引入大量外部套件。如有需要，Typst 亦支援由社群提供嘅套件同模板，例如 Typst Universe 係一個類似 CTAN 嘅資料庫，用嚟分享用戶自製嘅套件。

Typst 有三種模式：預設係標記模式（markup mode），用嚟編寫文字；用$符號包住嘅代碼係數學模式（math mode），用嚟輸入數學公式；代碼模式（code mode）用嚟執行子程式（function），用法係喺代碼插入#同埋子程式嘅名。

兼容性同轉換器

用家可以用自己電腦嘅文字編輯器寫 Typst 文件，再用編譯器輸出想要嘅格式；或者喺 Typst GmbH 提供嘅線上編輯器嗰度做。Typst 支持輸出做 PDF（包括 PDF/A-2b）、PNG、SVG 等格式。

如果係喺自己電腦寫，用家亦可以用一個叫 ｢微靄｣（Tinymist）嘅語言伺服器（language server），以外掛形式加落例如 VS Code、Neovim 等兼容嘅文字編輯器，咁之後就可以直接喺編輯器用 Typst 預覽、編譯等嘅功能。另外亦都有其他軟件唔用語言伺服器，而係整合咗 Typst 嘅功能，呢啲包括 Quarto 同 Pandoc。

印度證券行 Zerodha 由原本 LuaLaTeX 改用 Typst 嚟產生交易紀錄，係因為Typst 易用、編譯得快同埋編譯器嘅嘥士細。

例子

下面嘅例子示範 Typst 檔案同編譯器嘅輸出：

Input (Source code)

Output

#set page(paper: "a4") #set text(lang: "de") #set par(justify: true) = Fibonacci-Folge Die Fibonacci-Folge ist die unendliche Folge natürlicher Zahlen, die mit zweimal der Zahl 1 beginnt und bei der jede weitere Zahl die Summe der beiden ihr vorangehenden Zahlen ist. @wikipedia // Comments are introduced by a double backslash $ F_n = floor(1 / sqrt(5) phi.alt^n), quad phi.alt = (1 + sqrt(5)) / 2 $ #let count = 14 #let nums = range(1, count + 1) #let fib(n) = ( if n <= 2 { 1 } else { fib(n - 1) + fib(n - 2) } ) Die ersten #count Zahlen der Folge sind: #align(center, table( columns: count, ..nums.map(n => $F_#n$), ..nums.map(n => str(fib(n))), )) _Das Beispiel wurde von der Webseite GNU/Linux.ch übernommen._ @gnulinux #bibliography("quellen.bib")

睇埋

• LaTeX

出面網頁

• Typst嘅官方網站
• GitHub上嘅typst版面