YIDXP

O'zbekiston Respublikasi Yagona interaktiv davlat xizmatlari portali
O'zbekiston Respublikasi Yagona interaktiv davlat xizmatlari portali
Tijoratmi	yo‘q
Sayt turi	internet portal
Roʻyxatdan oʻtish	majburiy
Roʻyxatdan oʻtgan foydalanuvchilar soni	10 milliondan ziyod (2025-yil 1-fevral holatiga)
Qaysi tillarda	o'zbek, rus, ingliz
Muassisi	O‘zbekiston Respublikasi Raqamli texnologiyalar vazirligi
Ochilgan sanasi	1-iyul 2013-yil
Joylashuv	O‘zbekiston Respublikasi
Mamlakat	O‘zbekiston
URL	https://my.gov.uz/

Yagona interaktiv davlat xizmatlari portali (YIDXP) — bu butunjahon internet tarmog‘ida rasmiy internet portal bo‘lib, O‘zbekiston Respublikasi fuqarolari va biznes uchun elektron davlat xizmatlaridan foydalanish imkonini taqdim etadi. Portal davlat idoralari bilan o‘zaro hamkorlikni soddalashtirish va keng ko‘lamli davlat xizmatlariga yagona raqamli interfeys orqali tez va qulay kirishni taʼminlash maqsadida ishlab chiqilgan (my3.gov.uz).

Yagona interaktiv davlat xizmatlari portali (YIDXP) orqali taqdim etiladigan xizmatlardan foydalanish uchun foydalanuvchilar (jismoniy va yuridik shaxslar) Yagona identifikatsiya tizimida ro‘yxatdan o‘tishlari lozim. Buni quyidagi havola orqali amalga oshirish mumkin:

(OneID)

YIDXP tarixi

2013

2013-yil 1-iyul kuni Internet tarmog‘ida my.gov.uz veb-manzilida YIDXP 1-talqini test rejimida ishga tushdi.

YIDXP O‘zbekiston Respublikasi Prezidentining 2013-yil 14-fevraldagi PF-1920-son Farmoni bilan tasdiqlangan “Obod turmush yili” Davlat dasturiga hamda O‘zbekiston Respublikasi Vazirlar Mahkamasining 2012-yil 30-dekabrdagi 378-son qaroriga asosan yaratilgan.

YIDXP 1-talqida kundalik turmushga taalluqli soha va yo‘nalishlarni o‘z ichiga oluvchi 40 ga yaqin interaktiv xizmatlar taqdim etildi. Ularning ayrimlari quyidagilar:

Vazirlik va idoralarga murojaat yo‘llash;
Vazirlik va idoralar rahbari qabuliga yozilish;
Vazirlik va idoralarning bo‘sh ish o‘rinlari bo‘yicha murojaat qilish;
Yuridik va jismoniy shaxslar uchun Internet va statsionar telefon ulash uchun ariza berish;
Davlat soliq xizmatlari organlari tomonidan soliq qarzi mavjud emasligi to‘g‘risida ma’lumotnoma olish uchun ariza berish;
Telekommunikatsiya sohasiga tegishli litsenziyalarni olish bo‘yicha ariza berish.

2014

YIDXP faoliyatining birinchi yilida (2014 yil) katta hajmda ishlar amalga oshirildi. Davlat va xo‘jalik boshqaruvi organlari, shuningdek, mahalliy davlat hokimiyati idoralari, jumladan, tuman va shahar hokimliklaridan iborat 500 dan ortiq tashkilot portal tizimiga integratsiya qilindi.

Bu davr mobaynida 200 ga yaqin elektron davlat xizmati ishga tushirildi, bu esa o‘z navbatida fuqarolar va tashkilotlar uchun elektron davlat xizmatlaridan kengroq foydalanish imkoniyatini yaratdi.

2017

2017-yil 18-iyul sanasida YIDXP ning yangi 2-talqini my2.gov.uz (Wayback Machine saytida 2018-06-20 sanasida arxivlangan) veb-manzilida ishga tushdi hamda bugungi kunga qadar faol foydalanib kelinmoqda. YIDXP 2-talqini jismoniy va yuridik shaxslarning ma’lumotlar bazasi bilan integratsiya qilingan hamda Portalga kirish foydalanuvchilar yagona identifikatsiyasi qilish tizimi (OneID) orqali amalga oshiriladi.

Shuningdek, YIDXP 2-talqinida fuqarolar (jismoniy shaxslar) va tadbirkorlar (yuridik shaxslar) shaxsiy kabinetlari ajratilgan va shu bilan birga elektron davlat xizmatlari uchun onlayn to‘lov imkoniyati yaratildi.

Yagona portalning 2-talqinida portal foydalanuvchilari hisoblangan ish haqi va pensiyalar to‘g‘risidagi ma’lumotlarni onlayn tarzda olishlari, to‘lanmagan soliqlar, kommunal xizmatlar, ijro hujjatlari va yo‘l harakatiga oid jarimalarini tekshirishlari mumkin.

2020

2020 yil iyulida, Adliya vazirligi huzuridagi Davlat xizmatlari agentligi bilan hamkorlikda “O‘zbekistonning qishloq hududlarida davlat xizmatlarini taqdim etishni takomillashtirish va boshqaruv darajasini oshirish” loyihasi doirasida yangi mexanizmlar joriy etildi.

Bu yangiliklar qishloq joylarida yashayotgan aholi uchun davlat xizmatlarini yana-da sifatli va oson olish imkoniyatini yaratdi.

2023

2023-yil 24-oktabr kuni ICT Summit 2023 tadbirlari doirasida YIDXP ning yangi 3-talqini my3.gov.uz veb-manzilida taqdim etildi. YIDXP 3-talqini zamonaviy texnologiyalar asosida takomillashtirilgan dizaynga ega bo‘lib, MyID yuzni tanish orqali identifikatsiyadan o‘tish, “Muxlisa” ovozli yordamchisi, elektron xizmatlarni baholash kabi imkoniyatlarni o‘z ichiga oladi.

Huquqiy tartibga solinishi

O‘zbekiston Respublikasining “Elektron hukumat to‘g‘risida”gi Qonuni 28-moddasiga muvofiq elektron davlat xizmatlari ariza beruvchilarga davlat organlarining rasmiy veb-saytlari orqali hamda davlat organlari tomonidan ko‘rsatiladigan interaktiv davlat xizmatlaridan foydalanishning yagona nuqtasi bo‘lgan Yagona interaktiv davlat xizmatlari portali orqali ko‘rsatiladi.

Shuningdek, O‘zbekiston Respublikasi Vazirlar Mahkamasining 2017-yil 15-sentabrdagi 728-sonli qarori bilan tasdiqlangan YIDXP to‘g‘risidagi nizomga asosan YIDXP axborot, uslubiy, texnik kuzatuvi va ma’murchiligi “Davlat axborot tizimlarini yaratish va qo‘llab-quvvatlash bo‘yicha yagona integrator UZINFOCOM” MChJ tomonidan amalga oshiriladi.

Bundan tashqari, O‘zbekiston Respublikasi Vazirlar Mahkamasining 2020-yil 25-iyundagi 409-sonli qaroriga asosan elektron hukumat infratuzilmasini yanada rivojlantirishni ta’minlash, shu jumladan YIDXP, davlat xizmatlari va boshqa elektron hukumat axborot tizimlari xizmatlarini ko‘rsatganlik uchun to‘langan davlat boji va yig‘imlar miqdorini hisobga olishning yagona billing tizimini rivojlantirish “Raqamli hukumat loyihalarini boshqarish markazi” davlat muassasasining funksiyalaridan biri sifatida belgilangan.

Foydalanuvchilar

YIDXPdagi elektron davlat xizmatlaridan jismoniy (yakka tartibdagi tadbirkor) va yuridik shaxslar foydalanadilar. Ayrim davlat xizmatlaridan faqat ma’lum bir talablarni bajargan talabgorlar foydalanishlari mumkin.

2025-yil 1-fevral holatiga YIDXP foydalanuvchilar soni 10 milliondan oshdi. Foydalanuvchilarning 53,45 foizini erkaklar, 46,55 foizini ayollar tashkil etmoqda.

**Foydalanuvchilarning yosh bo‘yicha taqsimlanishi**
Foydalanuvchi yoshi	Umumiy miqdordagi ulushi
18 yoshgacha	1,76 foiz
19-24 yosh oralig‘ida	17,47 foiz
25-34 yosh oralig‘ida	31,02 foiz
35-44 yosh oralig‘ida	24,87 foiz
45-54 yosh oralig‘ida	13,40 foiz
55 va undan yuqori	11,48 foiz

Elektron davlat xizmatlari

Elektron davlat xizmati – axborot-kommunikatsiya texnologiyalari qo‘llanilgan holda ko‘rsatiladigan davlat xizmatidir.

YIDXP orqali ko‘rsatiladigan elektron davlat xizmatlari va servislar O‘zbekiston Respublikasi Vazirlar Mahkamasi tasdiqlagan huquqiy hujjat yoki Raqamli texnologiyalar vazirligi va Vakolatli tashkilot tomonidan tasdiqlangan kelishuvda ko‘rsatilgan tartib (reglament) asosida ko‘rsatiladi.

Elektron davlat xizmatlarini ko‘rsatish jarayonida ariza yuboruvchi to‘g‘risidagi maʼlumotlar (mulkka egalik huquqi, shaxsiy maʼlumotlar va boshqa zarur maʼlumotlar) davlat organlarining axborot tizimlaridan avtomatik ravishda olinadi. Bu maʼlumotlar idoralararo elektron hamkorlik asosida yunikal identifikatorlar orqali integratsiya qilinadi.

**2017-2024 yillarda YIDXP orqali ko‘rsatilgan xizmatlar va yuborilgan arizalar ko‘rsatkichlari**
Yillar	2017	2018	2019	2020	2021	2022	2023	2024
Xizmatlar soni (ta)	49	127	173	218	300	370	570	700
Arizalar soni (mln)	0,5	1,3	2,8	3,1	9,3	14,2	20,0	32,0

Elektron davlat xizmatlari xizmat ko‘rsatish muddatiga ko‘ra “avtomatik” hamda “yarim avtomatik” xizmatlarga bo‘linadi. “Avtomatik” davlat xizmatidan foydalanilganda xizmat natijasi darhol (avtomatik tarzda) taqdim etiladi, “Yarim avtomatik” davlat xizmatlarida esa xizmat ko‘rsatish muddati reglamentga muvofiq bir necha ish kunini tashkil etadi.

2025-yil 1-fevral holatiga ko‘ra YIDXPda 720ta elektron davlat xizmati joriy etilgan bo‘lib, mazkur xizmatlar 18 ta soha (Fuqarolik, Ta’lim, Oila va bolalar, Yoshlar, Ijtimoiy himoya, UJXK, Soliqlar, Bojxona, Transport, Ko‘chmas mulk, Ma’lumotnomalar va boshqalar) bo‘yicha taqsimlangan.

Jismoniy shaxslar uchun

YIDXP orqali joriy etilgan xizmatlardan 366 turdagi elektron davlat xizmatlaridan ham jismoniy, ham yuridik shaxslar foydalanishlari mumkin.Shuningdek, 252 turdagi xizmatlar faqat jismoniy shaxslar uchun foydalanishga taqdim etilgan.

**Jismoniy shaxslar tomonidan YIDXP orqali foydalaniladigan ommabop xizmatlar** (2024-yilda)
Xizmat nomi	Soha	Arizalar soni
Hisoblangan ish haqi summalari to‘g‘risida maʼlumot	Soliqlar	3 028 569
Mehnat daftarchasidan ko‘chirma olish	Maʼlumotnomalar	2 545 152
O‘zini o‘zi band qilgan shaxslarni ro‘yxatdan o‘tkazish	Soliqlar	1 873 493
IMEI raqamni FaceID orqali ro‘yxatdan o‘tkazish	Axborot va aloqa	1 569 820
Soliqlar va yig‘imlardan soliq qarzi mavjud yoki mavjud emasligi to‘g‘risida ma’lumotnoma berish	Soliqlar	1 560 492
Doimiy yashash joyi to‘g‘risida ma’lumotnoma berish	Maʼlumotnomalar	1 506 946
UzAuto Motors AJ orqali avtomobil sotib olish uchun navbatni tekshirish	Transport	1 357 007
Kam ta‘minlangan oilalarga bolalar nafaqasi va moddiy yordam tayinlashga ariza berish	Ijtimoiy himoya	1 216 396
Avtotransport boshqaruvi uchun jismoniy shaxslarga elektron ishonchnoma(sotish, boshqa davlatga olib chiqib ketish huquqisiz) berish	Transport	1 142 491
Bolani davlat maktabgacha ta’lim muassasasiga joylashtirish uchun ariza berish	Oila va bolalar	963 920

Yuridik shaxslar uchun

YIDXPda mavjud xizmatlardan 151 turdagisi faqat yuridik shaxslar uchun ko‘rsatiladi. Yuridik shaxslar tomonidan elektron davlat xizmatlaridan foydalanishda ayrim hollarda yuborilayotgan ariza elektron raqamli imzo (ERI) bilan tasdiqlash talab etilishi mumkin.

**Yuridik shaxslar tomonidan YIDXP orqali foydalaniladigan ommabop xizmatlar** (2024-yilda)
Xizmat nomi	Soha	Arizalar soni
Tashqi iqtisodiy faoliyatga tegishli kontrakt (shartnomalar) ma’lumotlarini Tashqi savdo operatsiyalarining yagona elektron axborot tizimiga kiritish	Iqtisodiyot, biznes va e-tijorat	212 728
Noturar obyektlarini kadastr pasportini shakllantirish va ularga bo‘lgan huquqni davlat ro‘yxatidan o‘tkazish	Ko‘chmas mulk	82 160
Loyiha-smeta hujjatlarini kelishish	Ko‘chmas mulk	71 203
Avtomobil transportida yo‘lovchilarni va yuklarni tashishga litsenziya olish	Transport	54 572
Yuridik shaxslarning hisobga qo'yilgan ma’lumotlari bilan tanishish	Iqtisodiyot, biznes va e-tijorat	44 251
Soliqlar va yig‘imlardan soliq qarzi mavjud yoki mavjud emasligi to‘g‘risida ma’lumotnoma berish	Soliqlar	40 082
Avtotransport vositalari oynalarining tusini o‘zgartirishga (qoraytirish) ruxsatnoma olish	Transport	38 200
O‘zbekiston Respublikasi hududida avtotransport vositasi orqali olib kirilayotgan yuk haqida ma’lumot olish	UJKX	22 016
Kitobning xalqaro standart raqamini (ISBN) berish	Litsenziyalash	21 764
Davlat kadastr reyestridan ko‘chmas mulk bo‘yicha ko‘chirma va kadastr pasportni tekshirish	Ko‘chmas mulk	21 606

MyGov mobil ilovasi

YIDXP orqali ko‘rsatilayotgan elektron davlat xizmatlarini aholi uchun yanada qulay formatda taqdim etish uchun MyGov mobil ilovasi ishlab chiqilgan bo‘lib, mazkur ilova orqali 2025-yil 1-fevral holatiga 527 ta xizmat taqdim etilmoqda.

MyGov mobil ilovasidan foydalanishning afzalliklari:

MyID yuzni tanish yordamida identifikatsiyadan o‘tish;
MobileID identifikatsiya usulidan foydalanib tizimga kirish;
YIDXP yoki Davlat xizmatlari markazlari orqali yuborilgan arizalarni kuzatish yoki natijasini elektron hujjat shaklida olish;
Pullik elektron davlat xizmatlari uchun to‘lov qilish;
YIDXP ga kirilgan qurilmalardagi sessiyalarni boshqarish.

MyGov mobil ilovasi orqali istalgan vaqtda elektron davlat xizmatlaridan foydalanish mumkin.

MyGov mobil ilovasini quyidagi havolalar orqali smartfon qurilmasiga bepul yuklab olib, o‘rnatish hamda elektron xizmatlardan foydalanishni boshlash mumkin: App Store hamda Google Play.

YIDXP modullari

Elektron davlat xizmatlari jismoniy va yuridik shaxslarga dxa.gov.uz moduli orqali; pochta bo‘limlarida postal.gov.uz sayti orqali hamda O‘zbekiston Respublikasining xorijdagi diplomatik vakolatxonalari va konsullik muassasalarida esa council.gov.uz modullaridan foydalangan holda ko‘rsatib kelinmoqda.

Pullik xizmatlarga 10 foiz chegirma

O‘zbekiston Respublikasining “Davlat boji to‘g‘risida”gi Qonuniga muvofiq har qanday davlat xizmatini olish, shu jumladan litsenziya, ruxsatnoma olish, davlat ro‘yxatidan o‘tish va boshqa xizmatlar uchun YIDXP orqali mustaqil ravishda murojaat etilganda davlat boji, yig‘imlar va boshqa to‘lovlar Davlat xizmatlari markazlari orqali yoki xizmat ko‘rsatuvchi organlarga bevosita murojaat etilgan taqdirda to‘lanadigan summaning 90 foizi miqdorida undirilishi belgilangan.

Shuningdek, ushbu Qonunga muvofiq, O‘zbekiston Respublikasi davlat xizmatlari markazlari va (yoki) Yagona interaktiv davlat xizmatlari portali orqali I va II guruh nogironlari hamda Yagona ijtimoiy himoya reyestrida ro‘yxatga olingan shaxslarga davlat xizmatlari ko‘rsatilganda, qonun hujjatlarida belgilangan davlat bojlari, yig‘imlar va boshqa to‘lovlarga nisbatan 50 foiz chegirma qo‘llaniladi, bundan tadbirkorlik faoliyati yoki yuridik shaxs vakili sifatida murojaat qilgan holatlar mustasno.

Jismoniy shaxsning YIDXPdagi shaxsiy kabineti

YIDXP foydalanuvchisining shaxsiy kabineti 17 ta boʻlimdan iborat boʻlib, unda foydalanuvchi, uning yashash joyi, oila tarkibi, ish joyi, koʻchmas mulk, transport vositalari, jarimalar, kommunal hisoblar qoldigʻi va boshqa turdagi maʼlumotlar aks etadi.

Bundan tashqari, shaxsiy kabinet orqali yuborilgan arizalar holatini kuzatishib borish va yuborilgan arizalar tarixini koʻrish mumkin.

Mukofotlar

Yil brendi 2022

Yil brendi 2023

TAF!23 “2023-yil mobil ilovasi”

TAF!24 “2024 yil veb-sayti” va “2024 yil mobil ilovasi”

Foydali havolalar

Manbalar