Yaya
E artíkulo aki ta skirbí na ortografia di papiamentu. Lo ta apresiá si por mantené e artíkulo aki na estilo di papiamentu.
Yaya (ingles: nanny; hulandes: kinderjuffrouw) ta referí na e tradishonal kuidadó di mucha di koló pretu, ku tabatin un ròl importante den famia blanku na Antias Hulandes durante i despues di sklabitut te ku añanan sinkuenta di siglo binti.[1] E tabata un persona ku, manera un di dos mama, tabata kuida i kría beibi i mucha den kasnan di famia riku, partikularmente famia hudiu i protestant. E konsepto di yaya tabatin gran impakto riba e edukashon di mucha, e plamamentu di papiamentu, i e preservashon di elementonan di kultura afrokurasoleño.
Historia
[editá | editá fuente]E figura di yaya a surgi for di sistema di sklabitut ku tabata eksistí na Kòrsou. Durante e époka di sklabitut, e yaya tabata un katibu di kas. E tabatin un lugá permanente den e kas i tabata mará ku e famia i e yu pa bida largu. Den sosiedat di klase tradishonal, e yaya a hunga un ròl esensial den famianan hudiu i protestant prominente, unda e tabata ser konsiderá manera parti di e famia. E kontakto frekuente entre yaya i e famia tabata profundo i afektivo, kreando un lazo estrecho di kariño i konfiansa.[2] Komo rekonosementu pa su lealtat i dedikashon, e famia na su turno tabata kuida e yaya ora e bira bieu, malu òf mester di yudansa.[1]
Despues di abolishon di sklabitut na 1863, e figura di yaya a kontinua den famianan ku moda, manteniendo un ròl importante. Ku tempu, variabelnan sosio-ekonómiko manera koló di kueru, religion, klase sosial, orígen étniko di famianan riku tabatin nan impakto riba e interpretashon i eksperensia di e figura di yaya.[3]
Tarea i ròl
[editá | editá fuente]Su tarea tabata e kuido i kriansa di e muchanan ku a wòrdu konfiá na dje dor di e doñonan di plantashi of famia blanku. Tin biaha e yaya tabata duna pecho en bes di e mama. For di infansia te adulto e tabata kuida nan, i hopi biaha tabata muda ku nan ora ‘su’ yu kasa, pa proveé pa e siguiente generashon.[4]
E yaya no tabata solamente un “nana” òf kuidadó di mucha. E tabata transmisor di kultura[5]: e ta konta kuentunan folklóriko manera Kompa Nanzi, e ta papia papiamentu ku e mucha, i e ta transmití norma, balor, i práktikanan di bida diario.[6] El a hunga un ròl krusial den plama papiamentu i den traspasá elementonan kultural afrokurasoleño.
Investigadónan manera Jeanne Henriquez i René Römer a duna nòmbernan manera mama sin dolo (mama sin malisia) i negra kuidadó di mucha, rekonosiendo e balor profundo di e yaya den formashon di identidat sosial i kultural di Antias Hulandes.[7]
Den distritonan pafó di Willemstad, e palabra ‘yaya’ tambe tabata wòrdu usá pa e hende muhé ku tabata yuda ku parto i kuido di beibi den e promé dianan despues di nasementu. Den sagrado seremonia di boutismo, e yaya aki tabata e persona ku tabata hiba e mucha na misa riba su brasa, siguí pa madrina i padrino.[8]
Yaya verso menchi
[editá | editá fuente]Den literatura oral tambe tin e término menchi (òf yaya di lechi), ku ta referí na e muhé, otro for di e mama, ku ta duna pecho na e mucha. Diferente for di e yaya kende ta keda ku e mucha te ku e ta grandi, e menchi tabata kuida e beibi solamente e promé dos aña.[9] Famianan di posishon altu tabata buska un menchi konfiabel promé ku e mucha nasé.[10]
Fuente, nota i/òf referensia
|