വിട്രെക്ടമി
| Vitrectomy | |
|---|---|
 Three port 23-gauge vitrectomy | |
| ICD-9-CM | 14.73-14.74 |
| MeSH | D014821 |
കണ്ണിൽ നിന്ന് വിട്രിയസ് ഹ്യൂമർ കുറച്ച് അല്ലെങ്കിൽ മുഴുവനായി നീക്കം ചെയ്യുന്ന ശസ്ത്രക്രിയയാണ് വിട്രെക്ടമി. കണ്ണിന്റെ മുൻ ഘടനയിൽ നിന്ന് വിട്രിയസ് ഹ്യൂമറിൻ്റെ ചെറിയ ഭാഗങ്ങൾ നീക്കംചെയ്യുന്നതാണ് ആന്റീരിയർ വിട്രെക്ടമി. വിട്രിയസ് ഹ്യൂമർ മുഴുവനായി അല്ലെങ്കിൽ ഭാഗികമായി നീക്കം ചെയ്തുകൊണ്ട് കണ്ണിന്റെ ഉള്ളിൽ ആഴമേറിയ ഭാഗത്ത് നിർവ്വഹിക്കുന്ന ഒരു കൂട്ടം പ്രവർത്തനങ്ങളെ പൊതുവായി വിശേഷിപ്പിക്കുന്ന പദമാണ് പാർസ് പ്ലാന വിട്രെക്ടമി.
ആധുനിക യുഗത്തിനു മുമ്പുതന്നെ, ചില ശസ്ത്രക്രിയാ വിദഗ്ധർ ക്രൂഡ് വിട്രെക്ടമികൾ നടത്തിയിരുന്നു. ഉദാഹരണത്തിന്, ഡച്ച് സർജനായ ആന്റൺ നക്ക് (1650-1692) ഒരു ചെറുപ്പക്കാരന്റെ ഇൻഫ്ലമേറ്റഡ് ആയ കണ്ണിൽ നിന്ന് സക്ഷൻ വഴി വിട്രിയ സ് നീക്കം ചെയ്തതായി അവകാശപ്പെട്ടു. [1] ബോസ്റ്റണിൽ, ജോൺ കോളിൻസ് വാറൻ (1778–1856) ആംഗിൾ ക്ലോഷർ ഗ്ലോക്കോമയ്ക്കായി ക്രൂഡ് ലിമിറ്റഡ് വിട്രെക്ടമി നടത്തി. [2]
വിട്രെക്ടമിയിൽ അനസ്തേഷ്യ
[തിരുത്തുക]വിട്രെക്റ്റമിക്കുള്ള അനസ്തേഷ്യ രീതികളിൽ ജനറൽ അനസ്തേഷ്യ, ലോക്കൽ അനസ്തേഷ്യ, ടോപിക്കൽ അനസ്തേഷ്യ, ട്രോജൻ അനസ്തേഷ്യ [3] (ആഗ്മെന്റഡ് ടോപ്പിക്കൽ അനസ്തേഷ്യ) എന്നിവയുണ്ട്.
ഓരോ അനസ്തേഷ്യ സാങ്കേതികതയ്ക്കും അതിൻ്റേതായ ഗുണങ്ങളും ദോഷങ്ങളുമുണ്ട്, കൂടാതെ അനസ്തേഷ്യയുടെ തിരഞ്ഞെടുപ്പ് ശസ്ത്രക്രിയാവിദഗ്ധന്റെയും രോഗിയുടെയും തിരഞ്ഞെടുപ്പ്, രോഗം, ആവശ്യമായ അധിക ശസ്ത്രക്രിയാ ഘട്ടങ്ങൾ എന്നിവ ഉൾപ്പെടെയുള്ള വിവിധ ഘടകങ്ങളെ ആശ്രയിച്ചിരിക്കും.
പാർസ് പ്ലാന വിട്രെക്ടമി
[തിരുത്തുക]1969 ൻ്റെ അവസാനത്തിലും 1970 ന്റെ തുടക്കത്തിലും തോമസ് എം. ആബർഗ്, സീനിയറിൻ്റെ സംഭാവനകളോടെ[4] റോബർട്ട് മച്ചേമർ ആണ് വിട്രെക്ടടമി ചെയ്തു തുടങ്ങിയത്. രക്തം കടന്ന് മൂടിയ വിട്രിയസ് ഹ്യൂമർ നീക്കം ചെയ്യുകയായിരുന്നു വിട്രെക്ടമിയുടെ യഥാർത്ഥ ലക്ഷ്യം. ആദ്യത്തെ നടപടിക്രമങ്ങളുടെ വിജയം വിട്രിയസിലെ മൂടൽ നീക്കം ചെയ്യുന്നതിനുള്ള സാങ്കേതിക വിദ്യകളുടെയും ഉപകരണങ്ങളുടെയും വികാസത്തിലേക്ക് നയിച്ചു. 1970 കളിലും 1980 കളിലും പുതിയ ഉപകരണങ്ങളുടെയും ശസ്ത്രക്രിയാ തന്ത്രങ്ങളുടെയും വികസനത്തിന് നേതൃത്വം നൽകിയവറിൽ ഒരാളാണ് സർജൻ/എഞ്ചിനീയർ സ്റ്റീവ് ചാൾസ്, എംഡി.[5]
അധിക ശസ്ത്രക്രിയാ ഘട്ടങ്ങൾ
[തിരുത്തുക]ആധുനിക വിട്രെക്ടമി ശസ്ത്രക്രിയകളുടെ ഭാഗമായി നടത്തുന്ന അധിക ശസ്ത്രക്രിയാ ഘട്ടങ്ങളിൽ ഇവ ഉൾപ്പെടാം:
മെംബ്രേനെക്ടമി-റെറ്റിനയിൽ നിന്ന് അനാരോഗ്യകരമായ ടിഷ്യു പാളികളെ ഫോർസെപ്സ് (ചെറിയ ഗ്രാസിംഗ് ടൂളുകൾ), പിക്സ് (ചെറിയ ഹുക്ക്) വിസ്കോ-ഡിസെക്ഷൻ (ടിഷ്യുവിന്റെ പാളികളെ ദ്രാവക ജെറ്റുകൾ ഉപയോഗിച്ച് വേർതിരിക്കുന്നു) പോലുള്ള ചെറിയ ഉപകരണങ്ങൾ ഉപയോഗിച്ച് നീക്കം ചെയ്യുന്ന നടപടിക്രമം. അനാരോഗ്യകരമായ ടിഷ്യൂകളുടെ ഈ പാളിയെ എപിരെറ്റിനൽ മെംബ്രൻ എന്ന് വിളിക്കുന്നു, ഇത് ആർക്കും സംഭവിക്കാം, പക്ഷേ പ്രായമായവരിലോ മുൻകാല നേത്രരോഗമോ നേത്ര ശസ്ത്രക്രിയ ചരിത്രമോ ഉള്ളവരിലോ ഇത് സംഭവിക്കാൻ കൂടുതൽ സാധ്യതയുണ്ട്.[6] രോഗിക്ക് ഒരു എപിരെറ്റിനൽ മെംബ്രൻ ഉണ്ടെങ്കിൽ, കാഴ്ച ശക്തി കുറയുന്നത് പോലുള്ള ലക്ഷണങ്ങളെക്കുറിച്ച് പരാതിപ്പെടുകയാണെങ്കിൽ, വിട്രെക്ടമിക്ക് പുറമേ ഒരു മെംബ്രനെക്ടമി കൂടി നടത്തുന്നു. ഈ അധിക ഘട്ടത്തിന്റെ സങ്കീർണതകൾ സ്റ്റാൻഡേർഡ് വിട്രെക്ടമി നടപടിക്രമത്തിന്റെ സങ്കീർണതകൾക്ക് സമാനമാണ്.[6]
ഫ്ലൂയിഡ്/എയർ എക്സ്ചേഞ്ച്-റെറ്റിനയെ താൽക്കാലികമായി ചേർത്ത് നിർത്തുന്നതിനോ റെറ്റിനയിലെ ദ്വാരങ്ങൾ അടയ്ക്കുന്നതിനോ ഇൻട്രാഒക്യുലർ മർദ്ദം നിലനിർത്തിക്കൊണ്ട് നേത്ര ഗോളത്തിന്റെ (ഗ്ലോബ്) പിൻഭാഗത്ത് നിന്ന് ഇൻട്രാഓക്യുലർ ദ്രാവകം നീക്കം ചെയ്യുന്നതിനായി കണ്ണിലേക്ക് വായു കുത്തിവയ്ക്കുന്നു. പിൻഭാഗം ഉടൻ തന്നെ ദ്രാവകം കൊണ്ട് നിറയുമെന്നതിനാൽ വായുവിൻറെ മർദ്ദം താൽക്കാലികമാണ്.
എയർ/ഗ്യാസ് എക്സ്ചേഞ്ച് -ചില സന്ദർഭങ്ങളിൽ, റെറ്റിനയെ ചേർത്ത് നിർത്താൻ വാതകം ഉപയോഗിക്കാം. ഗ്യാസ്, അല്ലെങ്കിൽ കൂടുതൽ സാധാരണയായി മിക്സഡ് ഗ്യാസും വായുവും സ്ക്ലെറയിലൂടെ നേത്ര ഗോളത്തിന്റെ പിൻഭാഗത്തേക്കു കുത്തിവയ്ക്കുന്നു. ഈ പ്രക്രിയയെ പലപ്പോഴും ന്യൂമാറ്റിക് റെറ്റിനോപെക്സി എന്ന് വിളിക്കുന്നു. പെർഫ്ലൂറോപ്രോപെയ്ൻ അല്ലെങ്കിൽ സൾഫർ ഹെക്സാഫ്ലൂറൈഡ് എന്നിവയാണ് സാധാരണയായി ഉപയോഗിക്കുന്ന വാതകങ്ങൾ. മിക്സഡ് ഗ്യാസ്, അവയുടെ ഉദ്ദേശ്യം പൂർത്തിയാക്കിക്കഴിഞ്ഞാൽ സ്വമേധയാ അപ്രത്യക്ഷമാകുകയും കണ്ണിന്റെ പിൻ അറ ദ്രാവകം കൊണ്ട് വീണ്ടും നിറയുകയും ചെയ്യുന്നു.[7]
സിലിക്കൺ ഓയിൽ കുത്തിവയ്പ്പ്-ഒരു എയർ/ഗ്യാസ് എക്സ്ചേഞ്ച് അല്ലെങ്കിൽ ന്യൂമാറ്റിക് റെറ്റിനോപെക്സിക്ക് നടപടിക്രമത്തിന് സമാനമായി, റെറ്റിനയെ ചേർത്ത് നിർത്താൻ കണ്ണിൽ ദ്രാവക സിലിക്കൺ നിറയ്ക്കാം.[7] ന്യൂമാറ്റിക് റെറ്റിനോപെക്സിയിൽ നിന്ന് വ്യത്യസ്തമായി, പിന്നീട് ശസ്ത്രക്രിയയിലൂടെ നീക്കം ചെയ്യുന്നതുവരെ സിലിക്കൺ ഓയിൽ കണ്ണിൽ നിലനിൽക്കുന്നു. എണ്ണകൾക്ക് വാതകങ്ങളേക്കാൾ സർഫസ് ടെൻഷനും ബോയൻസിയും കുറവായതിനാൽ എണ്ണ ചെലുത്തുന്ന ടെൻഷൻ വാതകത്തേക്കാൾ 30 മടങ്ങ് കുറവാണ്.[8]
ഫോട്ടോകൊയാഗുലേഷൻ-റെറ്റിനയിൽ ഒരു വിടവ് അല്ലെങ്കിൽ മുറിവ് ഉണ്ടാകുമ്പോഴോ അല്ലെങ്കിൽ അനാരോഗ്യകരമായ കേടുപാടുകൾ വരുത്തുന്ന രക്തക്കുഴലുകൾ ഉണ്ടാകുമ്പോഴോ (ഡയബറ്റിക് റെറ്റിനോപ്പതി ഉള്ള രോഗികളിൽ ഇത് കാണാൻ കഴിയും) ലേസർ ഉപയോഗിച്ചുള്ള ഫോട്ടോകൊയാഗുലേഷൻ ചികിത്സ ഉപയോഗിക്കാം.[7] അത്തരം സന്ദർഭങ്ങളിൽ, ദ്വാരം അടയ്ക്കുന്നതിനോ അനാരോഗ്യകരവും കേടുപാടുകൾ വരുത്തുന്നതുമായ രക്തക്കുഴലുകളുടെ വളർച്ച തടയുന്നതിനോ ലേസർ ഉപയോഗിക്കുന്നു.
സ്ക്ലെറൽ ബക്ലിംഗ്-റെറ്റിനയെ ശരിയായ, സ്ഥാനത്ത് നിലനിർത്തുന്നതിന് നേത്രഗോളത്തിന്റെ ചുവരുകൾക്ക് ചുറ്റും ഒരു ബെൽറ്റ് പോലെ ഒരു പിന്തുണ നൽകുന്ന നടപടിക്രമം. റെറ്റിന കോറോയിടിൽ നിന്നും വിട്ടുപോകുന്ന അവസ്ഥ ആയ റെറ്റിന ഡിറ്റാച്ച്മെന്റ് ഉള്ള രോഗികൾക്ക് സ്ക്ലെറൽ ബക്കിൾ സ്ഥാപിക്കുന്നത്, ശസ്ത്രക്രിയയ്ക്ക് ശേഷം ഏകദേശം 80 മുതൽ 90 ശതമാനം വരെ ആളുകളിൽ റെറ്റിന കോറോയിടുമായി വീണ്ടും ബന്ധിപ്പിക്കുന്നതിന് കാരണമാകുമെന്ന് തെളിയിക്കപ്പെട്ടിട്ടുണ്ട്. പരാജയപ്പെട്ടാൽ മിക്ക രോഗികളും വിട്രെക്ടമി വഴി ചികിത്സിക്കപ്പെടുന്നു.
ലെൻസെക്ടമി-ചില സന്ദർഭങ്ങളിൽ, വിട്രെക്ടമിയുമായി ചേർന്ന് ലെൻസെക്ടമി അല്ലെങ്കിൽ തിമിര ശസ്ത്രക്രിയ നടത്തുന്നു. കണ്ണിന്റെ ലെൻസ് അതാര്യമാകുമ്പോഴാണ് ഈ അധിക നടപടിക്രമം നടത്തുന്നത്. [7]
ശസ്ത്രക്രിയ ആവശ്യമായ അവസ്ഥകൾ
[തിരുത്തുക]വിട്രെക്ടമിയിൽ നിന്ന് പ്രയോജനം നേടുന്ന അവസ്ഥകൾ ഇവയാണ്:
റെറ്റിന ഡിറ്റാച്ച്മെന്റ്-റെറ്റിന കൊറോയിടിൽ നിന്നും വിട്ടുപോകുന്ന അവസ്ഥ. റെറ്റിന തിരികെ ബന്ധിപ്പിക്കുന്നതിനുള്ള ഘട്ടങ്ങളിൽ ആന്തരിക ദ്രാവകം ആയ വിട്രിയസ് വൃത്തിയാക്കുന്നതിനുള്ള വിട്രെക്ടമി, റെറ്റിന തിരികെ ബന്ധിപ്പിക്കുന്നതിന് ഫോട്ടോകൊയാഗുലേഷൻ, വീണ്ടും ഘടിപ്പിച്ച റെറ്റിനയ്ക്ക് പിന്തുണ നൽകുന്നതിനായി സ്ക്ലെറൽ ബക്ലിംഗ്, സ്കാർ ടിഷ്യു നീക്കം ചെയ്യുന്നതിനുള്ള മെംബ്രനെക്ടമി, റെറ്റിനയെ സ്മൂത്ത് ആക്കുന്നതിന് ദ്രാവകങ്ങൾ കുത്തിവയ്ക്കൽ, റെറ്റീന സുഖപ്പെടുമ്പോൾ അത് സുരക്ഷിതമാക്കാൻ ഗ്യാസ് അല്ലെങ്കിൽ സിലിക്കൺ ഓയിൽ കുത്തിവയ്ക്കുക എന്നിവ ഉൾപ്പെടാം.
മാക്യുലർ പക്കർ-സെൻട്രൽ റെറ്റിനയിൽ അനാരോഗ്യകരമായ ടിഷ്യുവിന്റെ ഒരു പാച്ച് രൂപപ്പെടുന്നത്. ഇതിനെ എപിറെറ്റിനൽ മെംബ്രൻ എന്നും വിളിക്കുന്നു. വിട്രിയസ് ജെൽ നീക്കം ചെയ്യുന്നതിനുള്ള വിട്രെക്ടമിക്ക് ശേഷം, ടിഷ്യു കളയാൻ മെംബ്രനെക്ടമി നടത്തുന്നു.
ഡയബറ്റിക് റെറ്റിനോപ്പതി-ഒരു നോൺ-പ്രൊലിഫെറേറ്റീവ് അല്ലെങ്കിൽ പ്രൊലിഫെറെറ്റീവ് റെറ്റിനോപതി കാഴ്ചയെ നശിപ്പിച്ചേക്കാം. കണ്ണിൽ പുതിയ അനാരോഗ്യകരമായ, സ്വതന്ത്രമായി രക്തസ്രാവം നടത്തുന്ന രക്തക്കുഴലുകളുടെ രൂപീകരണമാണ് പ്രൊലിഫെറേറ്റീവ് തരത്തിന്റെ സവിശേഷത. പലപ്പോഴും ഡയബറ്റിക് റെറ്റിനോപ്പതിയുടെ ഈ പ്രശ്നങ്ങൾ തടയുന്നതിനായി ലേസർ ഉപയോഗിച്ച് ആദ്യഘട്ടങ്ങളിൽ ചികിത്സിക്കുന്നു. രക്തസ്രാവം അല്ലെങ്കിൽ റെറ്റിന ഡിറ്റാച്ച്മെന്റ് ഉണ്ടാകുമ്പോൾ, വിട്രിയസ് അറയിൽ കടക്കുന്ന രക്തം വൃത്തിയാക്കാൻ വിട്രെക്ടമി ഉപയോഗിക്കുന്നു. പ്രമേഹരോഗികൾ ഡയബറ്റിക് റെറ്റിനൊപ്പതി അപകടങ്ങൾ തടയാൻ വർഷം തോറും കണ്ണ് പരിശോധന നടത്തണം.
മാക്യുലർ ഹോളുകൾ-വാർദ്ധക്യത്തോടൊപ്പം വിട്രിയസ് ഹ്യൂമറിന് സംഭവിക്കുന്ന സാധാരണ ചുരുങ്ങൽ ചിലപ്പോൾ സെൻട്രൽ റെറ്റിനയെ മുറിവേൽപ്പിക്കുകയും കാഴ്ചയെ തടയുന്ന ഒരു ബ്ലൈൻഡ് സ്പോട്ട് ഉള്ള ഒരു മാക്യുലർ ദ്വാരത്തിന് കാരണമാവുകയും ചെയ്യും.
വിട്രിയസ് ഹെമറേജ്-പരിക്കുകൾ, റെറ്റിന മുറിവുകൾ, സബരാക്നോയിഡ് ഹെമറേജുകൾ (ടെർസൺ സിൻഡ്രോം) അല്ലെങ്കിൽ രക്തക്കുഴലുകൾ ബ്ലോക്ക് ആകൽ എന്നിവയിൽ നിന്ന് കണ്ണിൽ രക്തസ്രാവമുണ്ടാകുന്നു. രക്തം നീക്കം ചെയ്തുകഴിഞ്ഞാൽ, ലേസർ ഫോട്ടോകൊയാഗുലേഷൻ വഴി അനാരോഗ്യകരമായ രക്തക്കുഴലുകൾ ചുരുക്കുകയോ റെറ്റിന ദ്വാരങ്ങൾ അടയ്ക്കുകയോ ചെയ്യും.
വിട്രിയസ് ഫ്ലോട്ടറുകൾ-സുതാര്യമായ വിട്രിയസ് ഹ്യൂമറിനുള്ളിൽ കാഴ്ചയെ തടസ്സപ്പെടുത്താൻ കഴിയുന്ന തരത്തിൽ ഫ്ലോട്ടറുകൾ ഉണ്ടായാൽ,, പാർസ് പ്ലാന വിട്രെക്ടമി, ഈ ലക്ഷണങ്ങളിൽ നിന്ന് ആശ്വാസം നൽകുമെന്ന് തെളിയിക്കപ്പെട്ടിട്ടുണ്ട്. [9] സാധ്യമായ പാർശ്വഫലങ്ങൾ കാരണം ഇത് കഠിനമായ കേസുകളിൽ മാത്രമേ ഉപയോഗിക്കുന്നുള്ളൂ.
സങ്കീർണതകൾ
[തിരുത്തുക]വിട്രെക്ടമി ശസ്ത്രക്രിയയുടെ ഫലമായി ഉണ്ടാകുന്ന ചില സങ്കീർണതകളുണ്ട്. തിമിരം ഏറ്റവും സാധാരണമായ സങ്കീർണ്ണതയാണ്. പല രോഗികളിലും ശസ്ത്രക്രിയയ്ക്ക് ശേഷമുള്ള ആദ്യ കുറച്ച് വർഷങ്ങൾക്കുള്ളിൽ തിമിരം വികസിക്കും.[10] മറ്റ് സാധാരണ സങ്കീർണതകളിൽ ഉയർന്ന ഇൻട്രാഒക്യുലർ മർദ്ദം, കണ്ണിൽ രക്തസ്രാവം, കണ്ണിന്റെ പിൻഭാഗത്തെ വീക്കം, റെറ്റിന എഡിമ എന്നിവ ഉൾപ്പെടുന്നു.[11] മിക്ക കേസുകളിലും, റെറ്റിന എഡിമയെ കൌണ്ടർ മരുന്നുകൾ ഉപയോഗിച്ച് നിയന്ത്രിക്കാൻ കഴിയും. കഠിനമായ കേസുകളിൽ, ഈ വീക്കം ഇൻട്രാ-ഒക്കുലാർ കുത്തിവയ്പ്പുകൾ ഉപയോഗിച്ച് ചികിത്സിക്കാം.[12]
വിട്രെക്ടമിക്ക് ശേഷമുള്ള കൂടുതൽ ഗുരുതരമായ സങ്കീർണതകൾ എൻഡോഫ്താൽമിറ്റിസ് (കണ്ണിലെ ദ്രാവകങ്ങളുടെ വീക്കം അല്ലെങ്കിൽ സുപ്രാകോറോയ്ഡൽ രക്തസ്രാവങ്ങൾ (കണ്ണിന്റെ കോറോയ്ഡല് പാളിയ്ക്ക് മുകളിൽ രക്തസ്രാവം) എന്നിവയാണ്. ഈ സങ്കീർണതകളുടെ നിരക്ക് 0.50% ൽ താഴെയാണെന്ന് റിപ്പോർട്ട് ചെയ്യപ്പെട്ടിട്ടുണ്ട്.
അവസാനമായി, റെറ്റിന വേർപ്പെടുന്നത് ശരിയാക്കാൻ വിട്രെക്ടമി ശസ്ത്രക്രിയ പലപ്പോഴും നടത്തപ്പെടുന്നുണ്ടെങ്കിലും, തുടർന്നു വീണ്ടും റെറ്റിന വേർപ്പെടുന്നത് ഒരു സങ്കീർണ്ണതയാണ്. ഇങ്ങനെ സംഭവിക്കുന്നതിന്റെ നിരക്ക് 5% ൽ താഴെയാണെന്ന് റിപ്പോർട്ട് ചെയ്യപ്പെട്ടിട്ടുണ്ട്.
വീണ്ടെടുക്കൽ
[തിരുത്തുക]കണ്ണിന്റെ ഉപരിതലം സുഖപ്പെടുത്താൻ രോഗികൾ ആഴ്ചകളോ അതിൽ കൂടുതലോ ഐ ഡ്രോപ്പുകൾ ഉപയോഗിക്കുന്നു. ചില സന്ദർഭങ്ങളിൽ, കനത്ത ഭാരം ഉയർത്തുന്നത് ഏതാനും ആഴ്ചകൾ ഒഴിവാക്കുന്നത്തിന് നിർദ്ദേശിക്കപ്പെടുന്നു.
റെറ്റിന ശരിയായി നിലനിർത്താൻ ചിലപ്പോൾ കണ്ണിനുള്ളിൽ ഒരു ഗ്യാസ് ബബിൾ സ്ഥാപിക്കാം. ഒരു ഗ്യാസ് ബബിൾ സ്ഥാപിക്കുകയാണെങ്കിൽ, ചിലപ്പോൾ തലയുടെ സ്ഥാനം പ്രത്യേക രീതിയിൽ നിലനിർത്തേണ്ടതുണ്ട്. ഗ്യാസ് ബബിൾ കാലക്രമേണ ഇല്ലാതാകുമെങ്കിലും ഇതിന് ആഴ്ചകൾ എടുക്കും.
ഫലം
[തിരുത്തുക]വിട്രെക്ടമിക്ക് ശേഷം കാഴ്ചയുടെ തിരിച്ചുകിട്ടുന്നത് ശസ്ത്രക്രിയക്ക് മുൻപുള്ള അടിസ്ഥാന അവസ്ഥയെയും, രോഗിയുടെ പ്രായത്തെയും ശസ്ത്രക്രിയയ്ക്ക് മുമ്പുള്ള അവരുടെ കാഴ്ചശക്തിയെയും ആശ്രയിച്ചിരിക്കുന്നു. ഉദാഹരണത്തിന്, ആരോഗ്യമുള്ള കണ്ണുകളിൽ രക്തം നിറഞ്ഞാൽ വിട്രെക്ടമിക്ക് പൂർണ്ണ കാഴ്ച (20/20) തിരികെ ലഭിക്കും. നിരവധി തവണ വേർപെട്ട റെറ്റിന പോലുള്ള കൂടുതൽ ഗുരുതരമായ പ്രശ്നങ്ങൾ ഉണ്ടെങ്കിൽ, അതിന് അനുസരിച്ചുള്ള കാഴ്ച മാത്രമേ കിട്ടുകയുള്ളൂ.
ഇതും കാണുക
[തിരുത്തുക]റഫറൻസുകൾ
[തിരുത്തുക]- ↑ "A Family of Early English Oculists (1600–1751), With a Reappraisal of John Thomas Woolhouse (1664-1733/1734)". Ophthalmology and Eye Diseases. 9: 1179172117732042. 2017. doi:10.1177/1179172117732042. PMC 5624362. PMID 28989288.
- ↑ "Ophthalmology in North America: Early Stories (1491–1801)". Ophthalmology and Eye Diseases. 9: 1179172117721902. 2017. doi:10.1177/1179172117721902. PMC 5533269. PMID 28804247.
- ↑ Gupta, Sanjiv Kumar; Kumar, Ajai; Sharma, Arun (2018-05-01). "Trojan horse anaesthesia: A novel method of anaesthesia for pars plana vitrectomy". Oman Journal of Ophthalmology (in ഇംഗ്ലീഷ്). 11 (2): 119–123. doi:10.4103/ojo.OJO_87_2017 (inactive 2021-01-17). PMC 5991053. PMID 29930444.
{{cite journal}}: CS1 maint: DOI inactive as of ജനുവരി 2021 (link) CS1 maint: unflagged free DOI (link) - ↑ "The development of pars plana vitrectomy: a personal account". Graefe's Archive for Clinical and Experimental Ophthalmology. 233 (8): 453–68. August 1995. doi:10.1007/bf00183425. PMID 8537019.
- ↑ "Microsurgical instrumentation for vitrectomy: Part II". Journal of Clinical Engineering. 9 (1): 63–71. 1984. doi:10.1097/00004669-198401000-00015. PMID 10265855.
- ↑ 6.0 6.1 "Epiretinal Membrane". American Academy of Ophthalmology. Retrieved 3 December 2019.
- ↑ 7.0 7.1 7.2 7.3 "16". Surgical Technology for the Surgical Technologist (2 ed.). Delmar Learning. 2004. pp. 580–581. ISBN 978-1-4018-3848-5.
- ↑ Petersen J. (1987). "The physical and surgical aspects of silicone oil in the vitreous cavity". Graefes Arch Clin Exp Ophthalmol. 225 (6): 452–6. doi:10.1007/bf02334175. PMID 3678857. S2CID 9857386.
- ↑ Roth M, Trittibach P, Koerner F, Sarra G (September 2005). "[Pars plana vitrectomy for idiopathic vitreous floaters]". Klinische Monatsblätter für Augenheilkunde. 222 (9): 728–32. doi:10.1055/s-2005-858497. PMID 16175483.
- ↑ Benson WE, Brown GC, Tasman W, McNamara JA (December 1988). "Complications of vitrectomy for non-clearing vitreous hemorrhage in diabetic patients". Ophthalmic Surgery. 19 (12): 862–4. PMID 3231410.
- ↑ Constantin, Brănişteanu (2016). "Vitrectomy surgery of diabetic retinopathy complications". Rom J Ophthalmol. 60 (1): 31–6. PMC 5712917. PMID 27220230.
- ↑ "macular-edema-treatment". AAO. 2018-08-07. Retrieved 22 November 2019.